Ağıllı ev nədir?
Ağıllı ev dedikdə, ümumən mənzildə, villada, binada və ya digər yaşayış və ya kommersiya daşınmaz əmlak obyektlərində qurğuların və sensorlu sistemlərin sinxronlaşdırılması nəzərdə tutulur.
Sistem - enerji resurslarının qənaətlə istifadəsinə, təhlükəsizliyin təmin edilməsinə, ev sakinlərinin rahat və komfortlu yaşayışına imkan yaradır.
Bu texnologiyadan istifadə etmək üçün sizə simsiz internet və smartfon lazım olacaq.
Sadəcə yanıb-sönən qurğular, taymerlər və ya TV pultlar ağıllı cihazlar sayılmır. Ağıllı cihaz simsiz əlaqə üzərindən proqram vasitəsilə aktivləşdirilir.
Ağıllı ev konsepsiyasına aşağıdakı elementlər daxildir:
- İdarəetmə sistemləri (audio və videotexnikanın, elektrocihazların idarə edilməsi, qapıların, qarajların açılıb, bağlanması);
- İstilik, ventilyasiya və kondisioner sistemləri (qızdırıcıların, kondisionerlərin idarə edilməsi, temperatur rejiminin tənzimlənməsi);
- İşıqlandırma sistemləri (otaqlarda işıqların yandırılıb, söndürülməsi, hərəkət detektorları və s.);
- Ağıllı bina sistemləri (binaya enerjinin verilməsi, kart sistemi, şlaqbaumların idarə edilməsi);
- Təhlükəsizlik və monitorinq sistemi (videomüşahidə, girişə nəzarət, barmaq izi və ya digər biometrik üsullarla sakinlərin tanınması, sistemlərin uzaqdan idarə edilməsi və s.).
Sistemin qiyməti istənilən funksiyalardan asılı olaraq formalaşır. Sadə sistemin qurulması yetərincə ucuz qiymətə başa gələcək. Lakin, çoxfunksiyalı sistemin qurulması üçün bahalı avadanlıqlar və daha çox iş tələb olunacaq ki, bu da əlbəttə son qiymətə təsir edəcək. Seçimdən asılı olmayaraq nəzərə almaq lazımdır ki, sistemin ilk növbədə layihəsi hazırlanır və adətən təmir prosesində quraşdırılır. Ağıllı ev sistemləri haqqında ətraflı məlumatı - www.agilliev.az saytından ala bilərsiniz.
Ağıllı ev təhlükəsizlik sistemi
Ağıllı ev oğurluqların qarşısının alınmasında daha effektivdir. Hərəkət detektorları, qapı və pəncərələrə yerləşdirilən maqnit sensorları vasitəsilə ev tam nəzarətdə saxlanılır və sakinlərin evdə olması imitasiyası yaradılır.
Evə kənar müdaxilə edildiyində əvvəlcədən qurulmuş ssenarilərin köməyi ilə işıqlar yanır, musiqi və televizor işə düşür.
Sistem vasitəsilə günün fərqli saatlarında evin jalüzlərini və işıqlarını avtomatik idarə etməklə sakinlərin evdə olması görüntüsü yaradıla bilər.
Əlillər və yaşlılar üçün Ağıllı ev
Ağıllı ev adi insanlar üçün sadəcə əlavə komfort və rahatlıq mənbəyidir. Əlillər və yaşlılar üçün isə bu texnologiyanın istifadəsi heç kimdən asılı olmadan müstəqil həyaq tərzi sürmək üçün böyük imkanlar yaradır. Məsələn:
- Kor və zəif görən insanlar səslə evdəki cihazları idarə edə, istiliyi tənzimləyə bilər;
- Hərəkət funksiyalarını itirən insanlar adi halda çatmayacaqları qurğuları bu sistem vasitəsilə mobil tətbiq üzərindən idarə edə bilərlər;
- Kar və zəif eşidən insanlar üçün təhlükəsizlik sistemləri faydalı ola bilər. Kar insan klassik mühafizə siqnalını eşitməyə bilər. Amma ağıllı sistem bu problemi həll edə bilər: evdə şübhəli aktivlik müşahidə olunan kimi istifadəçinin telefonuna vizual siqnallar verilə bilər;
- Bu texnologiya vasitəsilə himayədə olan uşaqların və qocaların gündəlik fəaliyyətini nəzarətdə saxlamaq olar.
